O Concello de Vigo promove O CANTO DAS ILLAS", un espectáculo musical e
audiovisual no Auditorio Mar de Vigo os días 20, 21 e 22 de febreiro, en apoio
á candidatura das Cíes como Patrimonio da Humanidade.
O espectáculo estará composto de catro bloques escénicos nos que se estreará
unha composición encargada especialmente para "O Canto das Illas", e
interpretadas por artistas de diferentes estilos. Entre os distintos bloques
integraranse os elementos audiovisuais: o videomapping (proxeccións adaptadas á
estrutura do entorno onde se realiza o evento) e Pintura en area, de Colette
Dedyn.
O primeiro bloque escénico,
chamado Illa Monteagudo, contará coa Orquesta Sinfónica Vigo 430 e o estreo
absoluto de Pórtico de Monteagudo, obra para arpa e orquesta composta por Juan
Durán, con Alba Barreiro como solista.
O bloque Montefaro terá por
protagonista a Lucía Martínez que actuará con mestres e o coro infantil da
Escola Municipal de Música, que interpretarán unha obra orixinal da artista.
A continuación chegará a
estrea absoluta da Suite San Martiño, composta por Anxo Pintos para a Orquestra
Folk de Galicia SonDeSeu, con alumnos da ETRAD. Os solistas serán Begoña Riobó
e Anxo Pintos.
O concerto proseguerá co
cuarto bloque, Illa dos Deuses, que incluirá unha suite de Rodrigo Romaní,
interpretada por SonDeSeu, a Orquesta Vigo 430, a Coral Casablanda e un
quinteto contemporáneo cos solistas Iván Ferreiro e Mónica de Nut, ademais do
Coro Infantil da Escola Infantil de Música. "O canto das Illas",
indicou o rexedor, rematará un espectáculo que subirá ata 200 músicos ao
escenario.
O acceso a "O Canto das Illas" para calquera dos tres días será gratuito e as entradas repartiránse na lonxa do Concello toda esta semana. O venres, 20 de febreiro, o espectáculo comezará ás 21 horas e os días 21 e 22 de febreiro, ás 19 horas. Esta acción enmárcase dentro das iniciativas previas ao inicio oficial do percorrido para que as Illas Cíes sexan recoñecidas Patrimonio medioambiental da Humanidade pola Unesco. Esta andaina comezará, segundo avanzou o rexedor vigués, Abel Caballero o próximo mes de xuño.
O CANTO DAS ILLAS
Auditorio Mar de Vigo
Venres, 20 de febreiro ás 21 horas
Sábado 21 ás 19 horas.
Domingo 22 de febreiro ás 19 horas.
Entrada gratuita previa retirada de invitacións na lonxa do Concello
(2 invitacións por persoa)
Ningún comentario:
Publicar un comentario