A Concellería de Educación do Concello de Vigo, a través das súas escolas municipais de música, presenta un ano máis o programa “Música coa escola”, co obxecto de facer partícipes aos centros de ensino de primaria e secundaria da cidade da promoción e desenvolvemento de actividades artísticas e creativas relacionadas coa música.
O programa, do que xa teñen coñecemento dende o primeiro trimestre deste ano escolar os centros educativos públicos e concertados da cidade, está dirixido ao alumnado de Primaria e de Secundaria e consiste no traballo previo sobre a unidade didáctica facilitada nas aulas e a posterior programación de concertos didácticos no Auditorio municipal (en horario matinal por parte do profesorado das escolas municipais de música).
A Escola Municipal de Vigo de Música Folk e Tradicional (ETRAD), presentará a 1.120 escolares VOCASÓNS.
A nosa cultura musical foi especialmente sensible á chegada e incorporación de ritmos, xéneros e melodías que hoxe en día forman parte do noso acervo musical en convivencia coas máis tradicionais como a muiñeira.
A transmisión oral foi, e segue a ser, a principal ferramenta de aprendizaxe na música tradicional. As palabras son, por tanto, protagonistas principais en todas as músicas do mundo e, por suposto, na nosa.
As palabras que dan nome aos ritmos cos que bailamos, tocamos e cantamos teñen, á súa vez, unha historia que nos contar.
Con Vocasóns queremos, coa complicidade da comunidade escolar, render un tributo musical ás verbas e ás línguas do mundo que son, sen dúbida algunha, unha das mellores e máis importantes creacións da humanidade.. Para este percorrido tan diverso, as mestras e mestres da escola, amosarán e tocarán todos os instrumentos das especialidades que se ensinan na escola: Arpa céltica, acordeón diatonico, canto popular, gaita, bouzouqui, percusión tradicional, requinta, violín folk e zanfona.
Cada música estará acompañada por un vídeo especialmente deseñado para o concerto por @CasaGallinitas, finalistas na vixente edición dos Premios Youtubeiras e que son parte do alumnado da nosa escola.
- Programa Música coa Escola
- VOCASÓNS
- Concertos Didácticos dos mestres da ETRAD
- Concellería de Educación. Concello de Vigo
- Marzo. Luns 18, martes 19, mércores 20, de 12:00hs a 13:00hs
- Xoves 21 en dobre sesión: de 10:00 a 11:00 e de 12:00 a 13:00hs.
- Entrada reservada aos centros de ensino participantes
Ningún comentario:
Publicar un comentario